Шу йил 11 февралда “Заковат” интеллектуал клубининг ННТ сифатида рўйхатга олингани маълум бўлди. “Заковат” – илм-фанни тарқатиш ва илгарилатиш учун ўта муҳим платформалардан биридир.

“Заковат” тарихи

“Заковат” интеллектуал ўйини 2001 йилда “Нима? Қаерда? Қачон?” ва “Брейн-ринг” ўйинларининг аналоги сифатида, уларнинг ғояларини ўзида жамлаган ҳолда ташкил топган. “Заковат” 20 йиллик тарихга эга. Унда ўйинчиларга саволлар берилади, билимдонлар белгиланган вақт ичида жавоб топишлари керак бўлади. Мактаб ва талабалар лигалари мавжуд; унда ҳам ҳаваскорлар, ҳам профессионаллар ўйнайдилар.

“Заковат” ўйини ташкил этилиши билан бир вақтда унинг телевизон талқини ҳам пайдо бўлди. 2001 йил 25 мартда “Заковат” интеллектуал шоуси биринчи марта эфирга чиқди. У  «Ёшлар», «Ўзбекистон», «Миллий» каби республика телеканалларида трансляция қилинган, аммо 2020 йилнинг охирига бориб, рейтинги паст эканлиги сабабли экранларга чиқмай қўйган.

“Заковат” ННТ ташкил этилиши

2021 йил бошларида Ўзбекистон Масс-медиа фонди “Заковат”ни ўз қарамоғига олишга қарор қилди, аммо уни шунчаки қайта тиклаб, ўйинга аввалги қизиқишни қайтариш эмас, балки мамлакатда “Ақлли бўлиш – ажойиб!” шиори остида бутун бошли интеллектуал ҳаракатни йўлга қўйишни истади.

ОАВ фонди “Заковат” интеллектуал клуби” нодавлат нотижорат ташкилотининг муассиси бўлди. Клубнинг асосий вазифалари ёшларнинг билимларга интилишини қўллаб-қувватлаш ва рағбатлантириш, китоб ўқиш маданиятини ривожлантириш, илм-фанни ҳаммабоп ва барча ёшдагилар учун қизиқарли қилиш мақсадида ҳаваскор олимлар иштирокида интеллектуал лойиҳаларни амалга ошириш саналади.

Кастинг ўтказилиши

Ёшларни интеллектуал ҳаракатга жалб қилиш борасидаги биринчи акция “Заковат” ўйини бўйича кенг кўламдаги чемпионат бўлди. Унда қатнашиш мақсадида “Заковат” клубига кириш учун 13 мингдан зиёд номзод ариза топширди, 1 932 киши рўйхатга олинди, улар 322 та жамоа таркибига кирди, яна 11 111 нафари индивидуал тартибда рўйхатдан ўтди.

Интеллектуал ҳаракатга қизларни жалб қилишга алоҳида эътибор берилмоқда.

Тошкент ва Тошкент вилояти жамоалари ўртасида “Заковат” турнири

Жорий йил март ойида “Ўзбекфильм” киностудияси павильонида турнирнинг 1,2, 3- ўринлари учун финал ўйинлари ўтказилди. Пойтахт вилояти ва Тошкент шаҳридан турнирда жами 530 жамоа қатнашди.

Ру-лига

Ўйинга бўлган катта қизиқиш унинг ташкилотчиларини “Заковат”нинг рус тилидаги талқинини ташкил этишга ундади.

Шу йил баҳорда Тошкентдаги Ботаника боғида “Заковат” рус тилидаги лигасининг биринчи турнири ўтказилди. Тадбирда бутун республикадан 187 та жамоа қатнашди, бу рус тилидаги сегментда интеллектуал ўйинлар ўтказиш борасида ҳам Ўзбекистонда ҳам МДҲдаги рекорд кўрсаткич бўлди. Ҳатто “Нима? Қаерда? Қачон?” бўйича жаҳон чемпионатларида ҳам 70–80 та жамоа тўпланади. “Заковат” RU-лигасининг турнири ёрқин шоу билан бирга ўтди. Ташкилотчилар тадбир бошланишидан олдин таниқли актёрлар ва Ўзбекистон Миллий симфоник оркестрини таклиф этиб, барча билимдонлар учун ҳақиқий байрам уюштирдилар.

Минтақавий турнирлар

 2021 йилнинг март–июнь ойларида Ўзбекистоннинг барча минтақаларида “Заковат” ўйинининг вилоят чемпионатлари ўтказилди. Ҳар бирида тўрттадан ғолиб жамоалар аниқланди. Яқин вақтларда барча жамоаларнинг ягона майдонда, финал ғолибларини аниқлаш учун учрашиши режалаштирилган. Минтақавий жамоалар ўртасида финал ўйинларининг ҳафталик марафони Ўзбекистоннинг энг яхши жамоаси номи учун курашиш билан ноясига етади.

Клуб истиқболлари

“Заковат” интеллектуал клуби ўз олдига ривожланиш ва билимлар сари интилаётган ёшлар ҳаракати етакчиси бўлиш, турли интеллектуал ўйинлар иштирокчиларини бирлаштирувчи платформасига айланишни мақсад қилиб қўяди. Клуб режаларида қуйидаги лойиҳаларни амалга ошириш кўзда тутилган:

– интеллектуал ўйинлар бўйича турли миқёсларда чемпионатлар ташкил қилиш (“Заковат”, шашка, шахмат, Рубик кубигини тезликка йиғиш ва ш.к.);

– илм-фан, адабиёт соҳасидаги атоқли кишилар, жамоат ва фан арбоблари иштирокида илмий конференциялар, семинарлар, учрашувлар, маҳорат сабоқлари ўтказиш;

– интеллектуал, илмий-оммабоп видео-подкастлар яратиш;

– ёшлар инновацион форумларини ташкил қилиш;

– интеллектуал ҳисса қўшганлиги учун йиллик мукофотни таъсис этиш;

– интеллектуал ва таълимий брошюралар, дарсликлар, ўқув қўлланмалари ва бошқа босма ёки электрон нашрларни чоп этиш;

– хорижий интеллектуал клублар билан ўзаро муносабатлар.

“Заковат” – Ўзбекистонда илм-фанни тарқатиш ва илгарилатишнинг энг муҳим платформаси, шунингдек ёшлар учун ўз илмий салоҳиятини рўёбга чиқаришнинг ажойиб имкониятидир.